Aqtóbe oblysynda memlekettik tildi úırenýge barlyq jaǵdaı jasalǵan. Bul týraly Óńirlik komýnıkasıalar qyzmetinde Aqtóbe oblysynyń tilderdi damytý basqarmasynyń basshysy Gúlaıym Tólebaeva málimdedi dep habarlaıdy Qamshy.kz aqparat agenttigi Aqtóbe oblysynyń Óńirlik komýnıkasıalar qyzmetine súıene otyryp.

         Qazirgi ýaqytta óńirde tilderdi qoldaný men damytýdyń  memlekettik baǵdarlamasynyń İİİ kezeńi aıasynda is sharalar kesheni júzege asyrylýda.

         G. Tólebaevanyń aıtýy boıynsha, qalamyzdaǵy eresek turǵyndardyń memlekettik tildi úırenýi úshin barlyq jaǵdaı jasalǵan. Jalpy alǵanda tilderdi damytý ortalyǵy  memlekettik, orys jáne aǵylshyn tilderin úıretý kýrstarymen 14 myń adamdy qamtyp, olarǵa birneshe deńgeı boıynsha qashyqtyqtan oqytý júıesin ázirlep otyr. 

        «Ózge ult jastarynyń arasynda tolerantty orta qurý  maqsatynda memlekettik jáne ana tilderin úırenýge jaǵdaı qarastyrylǵan. Búgingi kúni 4 myńǵa jýyq ár túrli etnos ókilderi jeksenbilik mektepterde bilim aldy. Júıeli jumys nátıjesinde halyqtyń negizgi bóligi oblystaǵy til ahýalyn oń baǵalasa, al qazaq tilin meńgergen halyqtyń  úlesi turaqty túrde ósip keledi. Sonymen qatar, oblysymyzda turatyn joǵary býyn ókilderiniń 93%, sondaı-aq orystar 93,8 %, aǵylshyndar 26,6%, al memlekettik tildi meńgergen ózge ult ókilderiniń úlesi 45% - dy quraıdy», - dedi basqarma basshysy.

        Aıta ketý kerek, óńirde balalardyń alǵashqy tildik daǵdylaryn damytatyn «Kúnshýaq» balalar jýrnaly, «Men úsh tilde sóıleımin» balalarǵa arnalǵan sózdik,  sonymen qatar, "Tilderdi oqytý: izdenis jáne ádisteme" aqparattyq-ádistemelik jýrnaly shyǵarylady. 

        Sondaı–aq Ulttyq onomastıkalyq keńistikti qalyptastyrý úshin tolyq ǵylymı negiz qurý jóninde sharalar qabyldandy. Táýelsizdik alǵan kúnnen bastap qazirgi ýaqytqa deıin 167 eldi mekenniń 146-na tarıhı ataýlary qaıtaryldy.

       «Jalpy alǵanda monıtorıńtik jáne túsindirý jumystarynyń nátıjesinde til zańnamasy salasyndaǵy quqyq buzýshylyqtar sany aıtarlyqtaı tómendedi »-dep, málimdedi Gúlaıym Tólebaeva.